Ko Ira Na Yalo Velavela
E levu na veika sa volai e nai Vola Tabu e baleti ira na agilosi, a kedra wiliwili, kei na nodrai tovo, kei na nodra cakacaka me vaka sa volai: “Na nona agilose; sa uasivi e na kaukauwa, ka sa cakava na nonai vakaro, ni dou sa vakarorogo tiko ki na nona vosa.” “Ka ra sa udolu vakaudolu sa qaravi koya, ka oba vakaoba sa wavu tu e matana.” “Na agilosi sa sega ni wili rawa.” “A sa vaka na livaliva na matana, a sa vulavula na nona i sulu.” “A ra sa sautaninini na sotia……a ra sa yaco me vakataki ira na mate.” A ra mataqali kaukauwa talega ko ira na agilosi ni sa volai: “Ia e na bogi ko ya, sa lako yani na agilosi i Jiova ka vakamatea e na nodrai tikotiko ni valu e le tinikawalu na oba ka lima na udolu na kai Asiria.”
Era sa vakatalai yani ki Sotoma, na agilosi, me ra vakabulai Loti; era sa vakani Ilaijia mai na vanua liwa, ka ra vakavolivoliti Ilaisa na parofita mai Tocani. E ra sa vakatalai yani vei Taniela me ra vakavukui koya mai Papiloni; ka ra vakabulai koya talega e na qara ni laioni. Era sa vukei Pita kei Paula ka vuqa na gauna sa dau talai ira na agilosi na Kalou vei ira na nona tamata me vakacegui ira se vakabulai ira mai na nodra leqa. “Na agilosi i Jiova, sa tiko vakavoliti ira era sa rerevaki koya a sa vakabulai ira.” Same 34:7. Ko ira na tamata ni Kalou era sa vakacegu rawa ni ra sa kila ni sa daunanumi ira na Kalou ka lesi e yadua na agilosi me ra vakatawani ira ka maroroi ira.
Ko ira na agilosi ca era sa oba vakaoba, ka milioni vakamilioni talega. Era a tiko mai lomalagi eliu ka ra vakatalai mai kina vata kei Setani, ni ra a talaidredre ki na lewa ni Kalou. Era sa lomavata kaya tiko ka ra cakacaka vaqaseqase, ka ra tovolea tiko me ra rawai ira na tamata, me ra vakaisini ira. Era sa mataqali kaukauwa ka ra daucurumi ira na tamata ka vakararawataki ira, ka lewa na nodrai valavala kei na nodra vosa, ka ra sa vaka na tamata bobula ka sega ni rawa me ra lewa e dua na ka, ni sa vauci ira vakaukauwa na yalo velavela.
E na Marika 5: 1 – 17 sa volai kina nai tukutuku kei na dua na tamata sa curumi koya e dua na yalo velavela. Ni sa raici Jisu ko koya sa cici yani ka cuva vua ka kerea na veivuke a ya me lomani koya ko Jisu ka me sereki koya mai nai vesu kaukauwa ni yalo ca ko ya. Ia ni sa tovolea me vosa ko koya sa sega ni cavuta rawa na ka sa bibi kina na lomana, ka sa kaya walega vei Jisu na ka sa lewa kina na yalo velavela a ya, “Mo kakua ni vakararawataki au.” Ia sa kila ko Jisu na lomana dina na tamata bobula ko ya ka sa sereki koya mai nai vesu kaukauwa ko ya. Ia ni sa kerea ko koya vei Jisu me lako vata kaya, sa tukuna vei koya ko Jisu, “Mo lako ki na nomudou, vei ira na wekamu, ka tukuna vei ira na levu ni veika sa cakava vei iko na Turaga, ka ni sa lomani iko.” Ia na yalo velavela ko ya sa ra lewe vuqa ka ra kerea vei Jisu me ra curumi ira na qele ni vuaka, a sa vakatara ko koya. A ra sa qai lako tani na yalo velavela, ka curumi ira na vuaka: a ra sa cici na qele ni vuaka e na baba ki na wasawasa, era sa rua beka na udolu; a ra sa ora kina.” Ni ra raica na ka levu oqo, ko ira nai taukei ni qele ni vuaka, kei ira na lewe ni vanua, era sa vakamasuti Jisu me lako tani e nodra vanua. Ni sa lewa ko Jisu me ra curu ki na qele ni vuaka ko ira na yalo velavela ko ya, sa vaka ni sa vunauci ira kina na Jiu ko koya ni sa sega ni dodonu vei ira me ra susu vuaka me tubu kina na nodrai lavo ni sa manumanu vakasisila na vuaka.
Sa vuqa tale na gauna sa vakatalai yani na yalo velavela me vaka sa volai e na Marika 7:26-30; Marika 9;17-27. E na Luke 4:33-36 sa vosa vei Jisu na yalo velavela ka kaya, ‘Au sa kilai iko, na nona le dua yalosavasava na Kalou.’ Ni sa kaya ko koya, ‘Au sa kilai iko’ sa kilai Jisu vakacava ko koya? Sa macala ni ra agilosi vinaka eliu ko ira kecega na yalo velavela ka sa nodra Turaga mai lomalagi ko Jisu; ka ni sa kaya na yalo velavela e na Marika 5:7 “ Mo kakua ni vakararawataki au” sa kilai ko koya ni ra na vakararawataki ka cudruvi ka vakarusai ko ira kecega na agilosi ca vata kei na nodrai liuliu ko Setani me vaka sa volai, “Ia raica, sa lako mai na siga ko ya, ena waqa me vaka na lovo; ia ko ira kece era viavialevu kei ira kece sa caka ca , era na vaka na vu-ni-sila; ia ena vakamai ira na siga ko ya sa lako mai, sa kaya ko Jiova ni lewe vuqa, me kakua kina ni vo vei ira na wakana se tabana.” Malakai 4:1. Na wekana , sai koya ko Setani; na tabana sai ira kece na agilosi ca kei ira talega na tamata ca.
E dua nai vakavuvuli tawa dodonu sa rogo e baleti ira na yalo ca se yalo curumi, a ya ni sai ira ga na wekada se na noda meca sa mate yani. Sa macala ni sa sega sara ni rawa me ra lesu mai nai bulubulu me vakaraitaka ira vei keda ni ra sa mate tu ka ra sa sega ni kila e dua na ka mai na gauna era sa mate kina me yacova na gauna era na rogoca na domo ni luve ni tamata me vaka sa volai, “Ni na lako mai na gauna era na rogoca kina na domona ko ira kecega e nai bulubulu, a ra na lako mai kina; ko ira sai valavala vinaka, era na tucake mai me ra bula; ia ko ira sai valavala ca era na tucake tale me ra cudruvi.” Joni 5: 28, 29.
E dua na ka sa rere kina ko Setani kei ira na nona agilosi ca, a ya ni sa vakamacalataki na nodra i valavala kei na nodrai tovo kei na nodrai lawaki ca. E dua tale, ni ra raici ira na tamata ni Kalou ni ra sa masu. E na ka eso sa marau kina ko Setani, a ya ni ra beci koya ko ira na tamata ka cavuta wale na yacana e na nodra qito, se na nodra meke, ka sa rawai ira kina ko koya.
Sa dodonu vei ira na tamata ni Kalou me ra ia tikoga vei koya na nodra vakavinavinaka ni ra sa dau lesi ko ira na agilosi vinaka, me ra maroroya na nona tamata de ra rawai ira ko ira na agilosi ca, ni ra sa daumarau kina ka lasa kina ni ra sa vakararawataka na lomadra na tamata kei na yalodra ka vakarusa na nodrai yau kei na nodra bula.
Comments
Post a Comment