Na Kawa e Rua

Ena gauna sa yaco kina na i valavala ca vei Atama kei Ivi, a vakatauca vei iratou na tolu - na gata, Atama kei Ivi - na kedratou i totogi. Ena mala ni veitalanoa a caka tiko qo, a cavuta kina na Kalou e dua na parofisai kei na vosa ni yalayala vua na na gata kei na yalewa ni rogo tu ko Atama:

...ia ka’u na vakaveimecakitaki kemudrau (na gata) kei na yalewa, kei na nomu kawa kei na nona kawa; ena butuqaqia na ulumu ko koya, ia ko na qaqia na bukubuku-ni-yavana. - Vakatekivu 3:15

Baleta ni tekivu mai nai valavala ca e vuravura ena nodrau veitalanoa na Gata vata kei na Yalewa, na Kalou e na tekivuna tale ga na kena vakabulai na tamata mai na kedrau maliwa. Mai vei rau na rua oqo e tubu mai e rau na kawa:

1. Na kawa ni yalewa
2. Na kawa ni gata

Oi rau na kawa e rua oqo e kaya na Kalou ni rau na veimecaki ka rau na veimecaki tiko me yacova ni cava na vuravura qo. Na nodrau veivaluvaluti na kawa e rua oqo e curukosova tu na i Vola Tabu taucoko. Oqo na i vakavatukana ni veivaluvaluti ena kedrau maliwa na Tevoro vata kei Jisu Karisito, na butobuto kei na rarama, na ca kei na vinaka, na dina kei na lasu, na i valavalaca kei na i valavala dodonu, na mate kei na bula.

Ena gauna a buli taumada kina na tamata, e a taucoko tu na nona veiwekani vata kei na Kalou me vaka ni a buli me "...i tovo vata...ka ucuya..." na Kalou. Eda kila ni a qai temaki rau na Tevoro ka rau digitaka me rau taladredre ki na nona i vakaro na Kalou.

Sa bale na tamata ka sa curuma mai na vuravura na i valavala ca kei na mate. Sa vaka e laurai ni sa rawata na qaqa na Tevoro. Qai takoso na Kalou me vakabula na tamata mai na mate. Ena nona vakatauca tiko na nodratou i totogi na gata, Atama kei Ivi, e sa tukuna rawa yani o koya ni na cakava na veivakabulai vua na kawa tamata (Vakatekivu 3:15).

Sa sucu na gonetagane o Keni, na i matai ni luvei Ivi kei Atama, ka sucu tarava mai ko Epeli. Ena nodrau tubu cake mai na gonetagane e rua qo, sa tekivu vakavatukanataki kina na kena sa kaba i valu mai na Tevoro. Na tekivu basika na duidui e tiko ena kawa e rua sa parofisaitaka mai na Kalou vei Atama kei Ivi. E da kila na i tinitini ni talanoa ni qai mokuta mate na tacina ko Keni. Sa vakavatukanataka o Keni ni wili o koya me nona kawa na gata (Tevoro).

Ena nodra a via vakamatei Jisu tiko na Jiu, a kaya vei ira o koya:

A tamamudou na tevoro, ia dou sa via kitaka na gagadre ca ni tamamudou. Ko koya na dauveivakamatei mai nai vakatekivu, a sa sega ni vakabauta na ka dina, ni sa sega vei koya na ka dina. Ni sa vosa lasu ko koya, sa vosataka na ka sa tu vua; ni sa daulasulasu ko koya, ka sa vu ni ka oqo. - Joni 8:44

Ena gauna ga eda digitaka kina me da talaidredre vua na Kalou ka kitaka na i valavala ca, eda sa wili me da nona kawa na tevoro.

Ni voleka ni mai cava nai Vola Tabu, e laurai tale kina na veivaluvaluti ena kedrau maliwa na kawa e rua oqo:

A sa cudru vua na yalewa na gata levu, ka laki ia na veivala kei ira na kena vo ni nona kawa, o ira sa vakabauta na vosa ni Kalou, ka taura tikoga nai tukutuku kei Jisu. - Vakatakila 12:17

Na i vakatakilakila ni nodra na tamata ni Kalou ni ra muria tiko na nona i Vunau na Kalou ka taura matua toka na vakabauta i Jisu. Gumatua ena nomuni vakasaqara na dina ni veika oqo mai nai Vola Tabu. A vola ko Joni:

Sa kalougata na tamata era sa sava na nodra i sulu, me ra kania vakaitaukei na kau ni bula, me ra curu e na matamata-ni-koro ki loma ni koro. - Vakatakila 22:14.

Me vakalougatataka na Kalou na nomuni vakekeli ena nona Vosa.

Praise the Lord...