Na Tatamusuki Levu

E a dau vakatavuvuli voli o Jisu ena bati ni drano mai Kalili. E na dua na siga sa lako tani mai vale ko Jisu, ka laki tiko sobu e matasawa. A sa lewe vuqa sara era sa soqoni vata vei koya, a sa vodoka kina e dua na waqa ko koya, ka tiko sobu: a sa tu kecega mai matasawa na lewe vuqa. A sa levu na ka sa vosataka vei ira ko koya e na vosa vakatautauvata. Maciu 13:1-3. 

MACIU 13:

24 Sa dua tale na vosa vakatautauvata sa tukuna vei ira ko koya, ka kaya, Sa vakatautauvatataki na matanitu vakalomalagi kei na dua na tamata sa kaburaka na sila vinaka e na nona were; 25 ia ni ra sa moce ko ira na tamata, sa lako mai na nona meca ka kaburaka vata na sila ca e loma ni witi, a sa qai lako yani. 26 Ia ni sa tubu mai na sila ka vua, sa qai rairai talega na sila ca. 27 Sa qai lako mai vua na kenai taukei ko ira na nona tamata, ka kaya vua, O a sega saka li ni kaburaka na sila vinaka e na nomu were? sa qai kau maivei na sila ca? 28 Sa qai kaya vei ira ko koya, A ka oqo sa kitaka e dua na meca. A ra sa kaya vua ko ira na tamata, O sa vinakata beka me keitou laki kumuna vata oqori? 29 A sa kaya ko koya, Tei kakua mada, de dou cavuraka talega na witi ni dou kumuna vata na sila ca: 30 laiva ga me rau tubu vata ruarua me tei cava mada na yabaki: ia ni sa cava na yabaki kau na kaya vei ira na dautamusuka, Dou kumuna vata mada na sila ca, ka vauca e na veivau me visa: ia dou kumuna vata na witi ki na noqu lololo.

Me da tuvana mada na veika e vakayacori ena i teitei:

1. Kakaburaki mai vei rau na rua na i to: na i taukei ni teitei kei na nona meca
2. Sa tubu ka kadre na i tei e rua
3. E kilai na kedrau duidui nai tei e rua ni rau sa vua
4. Tamusuki matai ko ira na sila ca ka biu kina bukawaqa
5. Tamusuki ko ira na witi vinaka ka biu ena nona i lololo na dauniteitei

Sa qai vakamacalataka ko Jisu vei iratou na nona tisaipeli na i balebale ni vosa vakatautauvata oqo:
MACIU 13:
37 A sa vosa ko koya, ka kaya vei ira, O koya sa kaburaka na sila vinaka, ko ya na Luve ni tamata: 38 ia na were ko vuravura; ia na sila vinaka ko ira na gone ni matanitu; ia na sila ca ko ira luve ni vu-ni-ca: 39 ia na meca sa kaburaka sai koya na tevoro: ia na yabaki nai vakataotioti kei vuravura: ia na dautamusuka ko ira na agilose. 40 Ia me vaka sa kumuni vata na sila ca ka visa e na buka; ena vakakina e nai vakataotioti kei vuravura oqo: 41 ena talai ira yani na nona agilose na Luve ni tamata, me ra soqona vata mai na nona matanitu na ka kecega sa dauveivakacalai, kei ira sa kitaka tiko na ka ca; 42 ia era na biuti ira ki na lovo ni buka waqa; era na dautagi kina, ka vakasequruquru bati. 43 Era na qai serau na tamata yalododonu, me vaka na siga, e na matanitu nei Tamadra. O koya sa vakadaligana, me mani rogoca sara.

Me da tuvana mada na veika e vakayacori ena i teitei nei Jisu:

1. Kakaburaki mai vei rau na rua na i to: Jisu kei na Tevoro
2. Sa tubu ka kadre na i tei e rua: na luve ni Kalou kei na luve ni Vunica
3. E kilai na kedrau duidui nai tei e rua ni rau sa vua: sa vakatulewataki na vanua eda wili kina ni bera ni cava na vuravura. E laurai ga na kena i vakatakilakila ena vua ni noda bula.
4. Tamusuki matai ko ira na sila ca ka biu kina bukawaqa. Era na gunuva na cudru ni Kalou na tamata i valavala ca ka biu ki na bukawaqa.
5. Tamusuki ko ira na witi vinaka ka biu ena nona i lololo na dauniteitei. Era na qai kau cake i lomalagi na tamata yalododonu me ra lai tiko vata kei na Kalou ka tawamudu.

Na vosa vakatautauvata oqo e parofisai ni vakataotioti kei vuravura. E levu na ka ena yaco me vakatakila vei keda ni da sa tiko ena i vakataotioti. A cavuta e dua na parofisai na noda i Vakabula:

Ia ni sa tubu vakalevu nai valavala ca, ena batabata mai na nodra loloma na lewe vuqa. Ia ko koya ena vosota me yacova nai vakataotioti, ena vakabulai ko koya. Ia ena vunautaki mada e vuravura taucoko nai tukutuku-vinaka oqo kei na matanitu, mei vakadinadina ki na veivanua kecega; sa na qai yaco emuri nai vakataotioti. Maciu 24:12-14. 

Ena tubu na i valavalaca ena noda vuravura io na vuravura ena qai cava ga ni sa kila na tamata taucoko na i tukutuku-vinaka ni matanitu. Na cava nai tukutuku vinaka oqo? Eda na vakasaqara na i sau ni taro oqo ena i Vola Tabu. Ai matai ni vakatakilakila me da raica ni tukutuku-vinaka oqo e dodonu me tarai vuravura taucoko. Eda na vakasaqaqara kina ena loma ni Vola Tabu me da raica kina e dua na i tukutuku-vinaka e solia mai na Kalou me vunautaki e vuravura taucoko. 

VAKATAKILA 14:
6 IA ka’u a raica e dua tani tale na agilose sa vuka e na maliwa kei lomalagi kei vuravura, a sa taura nai tukutuku-vinaka e sega ni oti rawa, me vunautaka vei ira era sa tiko e vuravura, vei ira kece talega na veimatanitu, kei na veimataqali, kei na duivosavosa, kei ira na tamata, 7 ka sa kaya e na domo levu, Dou rerevaka na Kalou, ka vakarokoroko vei koya; ni sa yaco na nona gauna me lewa: ia dou vakarokoroko vei koya ka buli lomalagi, kei vuravura, kei na wasawasa, kei na veivurevure-ni-wai. 

8 A sa dua tani tale, nai karua ni agilose sa muri, ka kaya, Sa bale, sa bale ko Papiloni, na koro levu, e na vuku ni sa vagunuvi ira kecega na veimatanitu e na waini ni cudru ni nona dautagane.

9 A sa muri rau nai katolu ni agilose, a sa kaya e na domo levu, Kevaka sa dua na tamata sa vakarokoroko vua na manumanu kei na nona matakau, ka rawata na nonai vakatakilakila e na yadrena, se na ligana, 10 ena gunuva ko koya na waini ni cudru ni Kalou, o koya sa sovaraki ka sega ni vakawai ki na bilo ni nona cudru; ena vakararawataki vakalevu talega e na bukawaqa kei na sulifure e na matadra na agilose yalosavasava, kei na mata ni Lami: 11 a sa kuvu cake na kubou ni nodra yaluma ka sega ni mudu: a ra sa sega ni cegu e na siga se na bogi, ko ira sa vakarokoroko vua na manumanu kei na nona matakau, kei ira era sa vakatakilakilataki e nai vakatakilakila ni yacana.

12 Oqo gona na nodra vosota na tamata yalosavasava: sa tu eke ko ira era sa vakabauta na vosa ni Kalou, ka taura tikoga na vakabauti Jisu.

Me vakadeuca mada na nodratou i tukutuku na agilosi e tolu qo:

1. Na vosa na "angel" e kau mai ena vosa va Kiriki (Greek) na "angelos" ka kena i balebale na "messenger" e dua e dau vakau i tukutuku.
2. Na nodratou i tukutuku na lewe tolu na agilosi oqo e kovuta na vuravura taucoko.
3. Na i tukutuku ni i katolu ni agilosi e boroya tiko na nodra tamusuki na tamata ca me biu ena nona bukawaqa na Kalou.

Na nodratou i tukutuku na Agilosi Lewe Tolu (3 Angels' Message) sa i koya na i tukutuku vinaka ena vunautaki e vuravura taucoko me vakarautaka ne kena tamusuki. Ena gauna sa na kila kece kina o vuravura na nodratou i tukutuku na agilosi e lewe tolu oqo, sa na qai cava ko vuravura. E vakanuinui tu ko lomalagi vei keda na tamata me da sorovaka na noda bula ka baburaka na i tukutuku vinaka oqo e vuravura taucoko.

2000 vakacaca na yabaki sa oti, a kaya ko Jisu, "O koya mo dou qai lako, ka vakalotutaki ira na lewe ni veivanua kecega, ka papitaisotaki ira e na yaca ni Tamamudou, kei na Luvena, kei na Yalo Tabu; vakavulici ira me ra vakabauta na ka kece kau a vosa kina vei kemudou: ka mo dou kila, au sa tiko vata kei kemudou e na veisiga kecega, ka yacova nai vakataotioti kei vuravura. Emeni." Maciu 18:19-20.

E warak tiko o Jisu e so na daunicakacaka me ra kauta na i tukutuku-vinaka ni nona matanitu me rawa ni tamusuki kina ko vuravura. E kaya o koya ena nona vosa, "E dina sa vakalewe na yabaki, a ra sa lewe lailai ga nai vakatau-ni-were; o koya mo dou masuti koya nai Taukei ni were, me tala yani eso nai vakatau-ni-were ki na nona were." Maciu 9:37-38.

Me qai solia vei kemuni na kaukauwa na Kalou mo ni kila na titobu ni nodratou i tukutuku na lewe tolu na agilosi me rawa ni oni vakadewataka vei ira kece na kai vuravura. Sa via lesu mai na Kalou, me da gumatua ena nona veikacivi.

God Bless You All...