Na Siga Tabu ni Solevu e Vitu

Ena gauna era a lako tiko kina mai Ijipita ki Kenani na kai Isireli, ... "A sa vosa vei Mosese ko Jiova, ka kaya, Mo vosa vei ira na Isireli, ka kaya vei ira, Na so levu i Jiova, dou na kacivaka mei soqosoqo tabu, ia oqo na noqu so levu. E ono na siga me caka kina na cakacaka: ia nai kavitu ni siga sa siga ni vakacecegu, nai soqosoqo tabu; dou kakua ni kitaka kina e dua na cakacaka: o koya sa siga ni vakacecegu vei Jiova e na nomudou i tikotiko kecega." Vunau ni Soro 23:1-3.

E vakarota na Kalou vei siga ni solevu oqo me caka na kena i valavala me vaka ga na Siga ni Vakacecegu e vakaroti tiko ena Vunau e Tini: "Mo nanuma na siga ni vakacecegu, mo vakatabuya. E ono na siga mo daucakacaka kina, ka kitaka kina na nomu cakacaka kecega; ia nai kavitu ni siga sa siga ni vakacecegu i Jiova na nomu Kalou; mo kakua ni kitaka kina e dua na cakacaka, ko iko, se na luvemu tagane se na luvemu yalewa, na nomu tamata se nomu vada, se nomu manumanu, se nomu vulagi sa tiko e na nomu lomanibai: ni sa buli lomalagi kei vuravura kei na waitui, kei na ka kecega sa tu maikina, ko Jiova e na siga e ono, a sa vakacegu e nai kavitu ni siga: o koya sa vakalougatataka kina ko Jiova na siga ni vakacecegu, ka vakatabuya." Lako Yani 20:8-11. 

Oqo sa so levu i Jiova, io nai soqosoqo tabu, dou na kacivaka e na kedra veivula:

1. Na Kana Vata ni Lako Sivia i Jiova

A sa vosa vei Mosese kei Eroni ko Jiova e na vanua ko Ijipita, ka kaya. A vula oqo ena kenai matai ni vula vei kemudou; na vula ka liu e na nomudou yabaki. Drau vosa vei ira nai soqosoqo taucoko ni Isireli, ka kaya, E na kenai katini ni siga ni vula oqo me ra taura e dua na lami na tamata yadua, me vaka na veivale ni nodra qase, e dua na lami ki na dua na vale. Ia kevaka sa lewe lailai na lewe-ni-vale me ra sega ni kania vakaoti rawa na lami, me ra qai kana vata kei na lewe-ni-vale ni kai nona era sa tiko voleka ki na nona vale, me dua na lami sa rauta na lewe-ni-vale ruarua; dou na wilika na tamata yadua, me vaka na ka sa daukania, ka me rauta ga na lami. A kemudou lami yadua me sega na kena ca, me ka tagane me yabaki dua; dou kauta maivei ira na sipi, se maivei ira na me: ia dou maroroya ka yacova na kenai katinikava ni siga ni vula ko ya: me ra qai vakamatea e na yakavi nai soqosoqo taucoko ni Isireli. Ia me ra taura e dua na kena dra, ka boroya kina na duru ruarua ni sogo, kei na ulu ni katuba, e na veivale era sa kania kina. Ia me ra kania na lewena e na bogi ko ya, ni sa tavu e na bukawaqa, kei na madrai sa sega ni vakaleveni; me ra kania vata kei na co gaga. Me kakua ni kania droka, se ni sa saqa e na wai, ka me tavu ga e na bukawaqa; a uluna, kei na yavana, kei na kena gacagaca. Ia me kakua ni vo e dua na tikina me yacova na mataka; ia na ka sa vo e na mataka dou vakama e na bukawaqa. Ia mo dou vakaoqo ni dou sa kania; Me vauci na tolomudou, me vakaivava na yavamudou, ka me taura nai titoko na ligamudou; ia dou kania vakatotolo: ko ya na kana ni lako-sivia i Jiova. Lako Yani 12:1-11. E na kenai katinikava ni siga e nai matai ni vula (Vula o Nisani), e na yakavi, ena ia na lako-sivia i Jiova. Vunau ni Soro 23:5. 

2. Na Solevu ni Kana Madrai Sega ni Vakaleveni

Ia e na kenai katinikalima ni siga ni vula ko ya (Vula o Nisani), sa na ia kina na soqoni vei Jiova ni kana madrai sa sega ni vakaleveni: e vitu na siga dou kania kina na madrai sa sega ni vakaleveni. E na kenai matai ni siga, dou ia kina e dua nai soqosoqo tabu: dou kakua ni cakava kina e dua na cakacaka vakavuravura. Ia dou vakacabora nai soro vei Jiova e na bukawaqa e na siga e vitu: e na kenai kavitu ni siga sa na dua kina nai soqosoqo tabu: dou kakua ni cakava kina e dua na cakacaka vakavuravura. Vunau ni Soro 23:6-8. 

3. Na Solevu ni i Sevu

Sa vosa talega vei Mosese ko Jiova, ka kaya, Mo vosa vei ira na Isireli, ka kaya vei ira, Ni dou sa yaco ki na vanua ka’u sa solia vei kemudou, ka sa tamusuka kina na kena vuata, dou na qai kauta e dua nai vau sila, nai sevu ni nomudou vuata, vua na bete: ia me qai yalovaka ko koya nai vau sila e na mata i Jiova, me ka dou na vinakati kina: me yalovaka na bete e na mataka sa tarava na siga ni vakacecegu. Ia e na siga kemudou sa yalovaka kina nai vau sila, dou cabora kina e dua na lami tagane sa sega na kena ca sa yabaki dua ga, mei soro kama vei Jiova. Ia nai madrali sa laukana vata kaya me rua na omeri madrai droka vinaka sa veiwaki vata kei na waiwai, nai soro sa cabo e na bukawaqa vei Jiova me ka boi vinaka: ia nai madrali sa liviraki vata kaya me waini e rua na paidi ka levu cake. Ia dou kakua ni kania na madrai, se na sila tavu, se na sola drokadroka, ka me yaco mada na siga dou sa kauta kina nai madrali vua na nomudou Kalou: oqo sai lesilesi ka sega ni mudu e na nomudou i tikotiko kecega, e na nomudou veitabatamata. Vunau ni Soro 23:9-14.

4. Na Solevu ni Penitiko

Ia ni sa oti na siga ni vakacecegu, na siga kemudou a kauta kina nai vau sila mei soro e yalovaki, mo dou wilika vei kemudou e vitu sara na wiki: ia me yacova na mataka ni sa oti na siga ni vakacecegu e vitu, dou wilika e limasagavulu na bogi; dou na qai cabora nai madrali laukana e na sila vou vei Jiova. Mo dou kauta mai na nomudou veivale e rua nai buli madrai sa caka e na omeri e rua, me yalovaki: me madrai droka vinaka; me vavi kei na leveni; me kenai sevu vei Jiova. Ia dou cabora vata kei na madrai e vitu na lami sa sega na kena ca, sa yabaki dua ga, ka dua na pulumokau, ka rua na sipi tagane: ka me sai soro kama vei Jiova, kei nai madrali laukana kei nai madrali liviraki vata kei ira, io nai soro sa cabo e na bukawaqa, me ka boi vinaka vei Jiova. Dou na qai vakamatea e dua na me tagane mei soro ni valavala ca, ka rua na lami tagane sa yabaki dua ga me cabori mei madrali ni veivinakati. Ia me yalovaka vata na bete kei na madrai sai sevu, mei soro sa yalovaki e na mata i Jiova, kei na lami ruarua: era na tabu me nei Jiova, me nona na bete. Ia e na siga ko ya dou kacivaka, me dua na nomudou i soqosoqo tabu; dou kakua ni cakava kina e dua na cakacaka vakavuravura: me sai lesilesi ka tawa mudu e na nomudou i tikotiko kecega e na nomudou veitabatamata. Ia ni dou sa tamusuka na vuata ni nomudou vanua, mo kakua ni vakaotia na bati ni nomu veiwere ni ko tamusuka, mo kakua talega ni tomika na ka sa lutulutu walega ni ko sa tamusuka na sila: mo laiva ga me nodra na dravudravua, kei na vulagi; Koi au ko Jiova na nomudou Kalou. Vunau ni Soro 23:15-22.

5. Na Solevu ni Uvu Davui

Sa vosa talega vei Mosese ko Jiova, ka kaya, Mo vosa vei ira na Isireli, ka kaya, E na kenai kavitu ni vula, e nai matai ni siga ni vula, me dua na nomudou siga ni vakacecegu, a gauna me vakananuma me uvu kina na davui, nai soqosoqo tabu. Dou kakua ni kitaka kina na cakacaka vakavuravura: dou cabora ga nai soro e na bukawaqa vei Jiova. Vunau ni Soro 23:23-25. 

6. Na Siga ni Veibuluti

Sa vosa talega vei Mosese ko Jiova, ka kaya, A kenai katini talega ni siga e na kenai kavitu ni vula oqo, na siga ni veibuluti: oqo sa dua na nomudou i soqosoqo tabu; dou vakamalumalumutaki kemudou kina, ka vakacabora e dua nai soro e na bukawaqa vei Jiova. Ia dou kakua ni kitaka e dua na cakacaka e na siga ko ya: ni sa siga ni veibuluti, mo dou sorovaki kina e na mata i Jiova na nomudou Kalou. Ia na tamata kecega sa na sega ni vakamalumalumutaki e na siga ko ya, ena muduki tani ko koya vei ira na kai nona. Kei na tamata kecega sa kitaka e dua na cakacaka e na siga ko ya, au na vakarusa tani na tamata ko ya maivei ira na kai nona. Dou kakua ni kitaka e dua na cakacaka: sai lesilesi ka tawa mudu e na nomudou i tikotiko kecega, e na nomudou veitabatamata. Ena siga ni vakacecegu mo dou vakacegu kina, ia dou vakamalumalumutaki kemudou: e na kenai kaciwa ni siga ni vula, e na yakavi, mai na yakavi e dua ka yacova na yakavi e dua, mo dou ia kina na nomudou i vakacegu. Vunau ni Soro 23:26-32. 

7. Na Solevu ni Vale Tabanikau

Sa vosa talega vei Mosese ko Jiova, ka kaya, Mo vosa vei ira na Isireli, ka kaya, A kenai katinikalima ni siga e na kenai kavitu ni vula oqo, me ia kina na so levu ni vale taba ni kau vei Jiova ka bogi vitu. E na kenai matai ni siga, me dua nai soqosoqo tabu; mo dou kakua ni kitaka kina e dua na cakacaka vakavuravura. E vitu na siga dou vakacabora kina nai soro e na bukawaqa vei Jiova: e na kenai kawalu ni siga, me dua na nomudou i soqosoqo tabu, ia dou na cabora e dua nai soro e na bukawaqa vei Jiova: sa soqoni tabu: dou kakua ni cakava kina na cakacaka vakavuravura. Oqo sa kena so levu vei Jiova, dou na kacivaka mei soqosoqo tabu, me vakacabora nai soro e na bukawaqa vei Jiova, nai soro kama, kei nai madrali laukana, na ka sa vakacabori, kei nai madrali liviraki, sa dui caka e na kena siga: ia oqo sa kenai kuri ni veisiga ni vakacecegu i Jiova, kei na nomudou i solisoli, kei nai madrali kecega dou sa bubului kina, kei na nomudou i soro kecega sa lomamudou mo dou cabora, o koya dou na solia vei Jiova. E na kenai katinikalima talega ni siga e na kenai kavitu ni vula, ni dou sa kumuna vata na vuata ni vanua, dou na ia kina na so levu vei Jiova ka bogi vitu; nai matai ni siga ena siga ni vakacecegu, ia nai kawalu ni siga ena siga ni vakacecegu talega. Ia e nai matai ni siga dou taura na vua ni kau vinaka, kei na taba ni viu kei na taba ni kau sa sobi na drauna, kei na wilou mai na uciwai: ia dou na reki e na mata i Jiova na nomudou Kalou ka bogi vitu. Ia dou na ia na so levu oqo, na so levu vei Jiova, me bogi vitu e na veiyabaki. Oqo sa kenai lesilesi tawa mudu e na nomudou veitabatamata: dou daukitaka e na kenai kavitu ni vula. Mo dou tiko bogi vitu e na veivale taba ni kau: o ira kecega sai taukei vei ira na Isireli era na tiko e na veivale taba ni kau: me ra kila kina na nomudou veitabatamata ni sai au era dautiko kina ko ira na Isireli e na veivale taba ni kau, ni’u a kauti ira mai na vanua ko Ijipita: Koi au ko Jiova na nomudou Kalou. A sa tukuna vei ira na Isireli na so levu i Jiova ko Mosese. Vunau ni Soro 23:33-44.