Na vakadomobula ni sara i yaloyalo

Sa i tovo tu ni vuravura ena gauna ni kua na sara i yaloyalo. Era bulia mai na i talanoa na dau ni volavola ka ra boroya vakaiyaloyalo ko ira na kena dau me rawa ni da sarava ena matanavotu e dua na i talanoa. O ira na tamata era vakaitavi kina (actors & actresses) era vakavulici me ra vakatasuasuataka vakamaqosa na veitalanoa eso e biu mai. Era dau kaburaki e vuravura taucoko na i yaloyalo oqo me sarava o ira na tamata kece. Ena kena tekivu mai na Yaloyalo ena 1880s, sa tubu cake sara na kena rogo ena noda vuravura.

Na kena tete mai qo e curuma sara ga na noda vei vale eso ka tara sara ga na noda bula ena veisiga. E vakavuna me veisau na noda i tovo kei na i vakarau ni noda raica na vuravura. Ena gauna ni kua, sa vuqa na veika e vakaraitaki mai ena noda veivale ni yaloyalo me vaka na veivakamatei, na veiyacovi, na mateni, na lasa vakavuravura kei na veika vakasisila tale eso. Na ka e vakadomobula kina na veika oqo ni sa yaco sara ga vei ira na gone me ra raica ka sa tekivu me veisautaka vakamalua na nodra i tovo. E dodonu vei keda kece na tamata me da qarauna vinaka na veika e matanataka mai o vuravura me temaki keda kina mai na Dina ni Vosa ni Kalou. 

E levu na ka ena tevuka e matada na Tevoro, na tui ni vuravura oqo me tarova kina na noda rawata na bula tawamudu. E kila tiko na tevoro ni tamata kece era vakaweleweletaka na masu kei na kena vulici na Vosa ni Kalou era na rawai ena nona i cori. Oya na vuna e bulia mai kina o koya na vei yaragi eso me vaka na i yaloyalo vakavuravura me vakaosota na noda vakasama.

Na gagadre marau kei na lasa vakavuravura e i cori vei ira na tamata ni Kalou, vakabibi vei ira na gone. Na noda veikoro lelevu ni kua era sa vaka i Sotoma kei Komora. Sa tubu cake sara vakatotolo na kena vakatovotovtaki na veika vakasisila ni lasa vakavuravura eso. O ira na i tabagone era sa kuitaki ena i kui ni lasa ka ra dolava e dua na ualuvu levu ni veitemaki eso. Na nodra veitaratara vata kei ira na kai vuravura e vakagaga sara ga na nodra vakasama ka vakayalia vakadua na kedra yaga ena matanitu ni Kalou. Ena batabata sobu mai na nodra via cuqena na lotu ka butobuto sobu na nodra bula vakayalo. Na i tuvaki ni yalodra e vakalolovirataki ka cavuka na kedra i sema vei lomalagi. 


Na sara i yaloyalo e dua vei ira na ka e vakavuna sara ga vakalevu me yaco vei keda na tawase mai vei lomalagi. Ni tubu cake mai e dua na gone, na i wase levu ni ka e vulica e lako mai ena ka e vakaraica. Kevaka sa vakamatautaki vei ira na gone me ra vakaraica na veika vakasisila eso era vakaraitaki tu ena noda vei yaloyalo, ena veisau ga na gone oya me vaka na ka e vakaraica. E dodonu vei ira na i tubutubu me ra qarauna vinaka na kakana era vakania kina na nodra vakasama na gone. E vuqa vei ira noda i yaloyalo ena gauna qo e boroi tu ga mai kina na i tovo kaukauwa. E sega ni na vakacalaka ni ra na tubu mai na gone era dau sara i yaloyalo me ra i tovo kaukauwa. 

Na i Vola Tabu e kaya, "O koya ga, se dou kana, se dou gunu, se cava na ka dou sa kitaka, mo dou kitaka kecega me vakarokorokotaki kina na Kalou." 1 Koronica 10:31. E vuqa vei ira na i yaloyalo oqo e tu ga kina na i talanoa lasu, na i tovo kaukauwa, na i valavala vakasisila ka veika oqo e sega ni vakarokorokotaki kina na Kalou. E vola ko Paula, "Vakatovolea na ka kecega; taura matua na ka e vinaka. Qarauni kemudou mai nai valavala kecega sa ca." 1 Cesolonaika 5:21-22. 

Sa tu na vakanuinui ni da kerea vua na Kalou na kaukauwa me tawasei keda tani mai na kena curuma mai noda veimatavuvale na veika vakarerevaki eso e vakarautaka mai na Tevoro. Me vakalougatataki kemuni na Kalou...